Streitan er óumflýjanlegur hluti daglegs lífs. Hún getur verið jákvæð þegar hún kemur fram við réttar aðstæður en heilsuspillandi þegar hún er langvarandi.
Við erum misvel í stakk búin til að mæta álagi. Sumir ná að halda ró sinni í mjög krefjandi aðstæðum á meðan aðrir fara yfir strikið við minnsta álag. Ef við náum að beina streitunni í réttan farveg getur hún verið jákvæður kraftur sem hvetur okkur til dáða og eykur einbeitinguna og afköst.
Hér fyrir neðan eru nokkrar ráðleggingar til að ná betri tökum á streitu:
- Þekktu eigin streituviðbrögð og hversu mikið álag þú þolir. Taktu eftir viðbrögðum og aðvörunum líkamans.
- Listaðu upp hvaða streitu þú ert að upplifa og leitaðu leiða til að minnka hana.
- Hliðraðu þér við þær aðstæður sem þú veist að valda þér streitu.
- Gakktu úr skugga um að vinnuumhverfið þitt sé aðlaðandi og líf þitt vel skipulagt.
- Forgangsraðaðu rétt og bættu tímastjórnunina.
- Lærðu að segja nei og sýndu festu í samskiptum.
- Taktu þér frí reglulega og notaðu alla þína frídaga. Undirbúðu þig vel þannig að þú neyðist ekki til að fylgjast með tölvupóstum í fríinu eða taka vinnutengd símtöl.
- Tryggðu líkamanum nægan svefn. Það eykur einbeitinguna, bætir vellíðan og eykur afköst í starfi.
- Hlustaðu á skilaboð líkamans og virtu þarfir hans og takmarkanir.
- Skoðaðu hvaða hugsanir fara í gegnum kollinn. Skiptu út órökstuddum neikvæðum hugsunum fyrir jákvæðar og uppbyggilegar.
- Taktu frá tíma fyrir hvíld í hverri viku, t.d. með því að sinna áhugamáli.
- Borðaðu heilsusamlegan mat. Forðastu efni sem örva streitu eins og t.d. koffín, áfengi, nikótín og sykur.
- Drekktu vatn ríkulega.
- Hreyfðu þig reglulega og veldu þá tegund hreyfingar sem þér finnst skemmtileg. Hreyfing er ein besta leiðin til vellíðunar.
- Ræktaðu tengsl við vini, fjölskyldu og ættingja. Skapaðu heilbrigt jafnvægi milli starfs og einkalífs.
- Stundaðu hugleiðslu, slökun, jóga eða djúpöndun til að útrýma spennu bæði úr huga og líkama. Veldu þá aðferð sem hentar þér best.
- Gefðu þér tíma til að njóta lífsins og gera hluti sem þú hefur ánægju af.
Greinarhöfundur: Ingrid Kuhlman. Birtist á Pressunni 21. febrúar 2014.
