Breytingum fylgir oft óvissa sem getur kallað fram óöryggi, mótstöðu og jafnvel átök á vinnustað. Við slíkar aðstæður reynir sérstaklega á stjórnendur, enda getur framganga þeirra ráðið miklu um hvernig starfsfólk upplifir breytingarnar og hversu vel tekst að innleiða þær.
Árangursrík breytingastjórnun snýst ekki aðeins um að skipuleggja og innleiða breytingar, heldur fyrst og fremst um að leiða fólk í gegnum þær. Skýr tilgangur, góð upplýsingagjöf, samráð og virk þátttaka starfsfólks geta skipt sköpum. Stundum þarf þó að sýna festu og taka erfiðar ákvarðanir, sérstaklega þegar aðrar leiðir hafa ekki skilað tilætluðum árangri.
Hefðbundin ímynd hins sterka leiðtoga, sem hefur öll svörin, vísar veginn og fær aðra til að fylgja sér, endurspeglar sjaldnast raunveruleikann. Breytingar eru oft flóknar og ófyrirsjáanlegar og stjórnendur vita ekki alltaf nákvæmlega hvert ferðinni er heitið eða hvaða leið er best að fara. Það er heldur ekki nóg að stjórnandinn sjái fyrir sér framtíðina. Til að breytingar skili árangri þarf að skapa sameiginlegan skilning, byggja upp traust og fá starfsfólkið með í ferðalagið.
Í þessum fyrirlestri er farið yfir þekktar breytingakenningar og hagnýtar aðferðir í breytingastjórnun sem nýtast stjórnendum við að leiða fólk í gegnum breytingar. Meðal annars er fjallað um hlutlausa svæðið (e. neutral zone) í breytingalíkani William Bridges, sem hann lýsir í bókinni Managing Transitions. Það er tímabilið á milli þess sem var og verður, þegar gamla skipulagið hefur vikið en hið nýja ekki enn fest sig í sessi. Þetta tímabil getur reynst krefjandi, en jafnframt skapað dýrmæt tækifæri til nýsköpunar, þróunar og vaxtar.
