Hugarfar okkar hefur meiri áhrif á líðan, hegðun og frammistöðu en við gerum okkur oft grein fyrir. Rannsóknir undanfarinna áratuga hafa varpað áhugaverðu ljósi á hvernig væntingar okkar, viðhorf og hugsanamynstur geta mótað upplifun okkar og jafnvel haft áhrif á líkamleg viðbrögð. Það er sem dæmi hægt að bæta frammistöðu sína í sjónprófi með því að ímynda sér að maður sé orrustuflugmaður. Einnig getum við stjórnað magni af hinu svokallað hungurhormóni með því að telja okkur trú um maturinn sem við erum að fara að borða sé einstaklega gómsætur – eða ekki. Við erum stöðugt að segja okkur sjálfum sögur um það hver við erum, hvers við erum megnug og hverju við megum búast við. Þessar sögur geta ýmist hjálpað okkur áfram eða haldið aftur af okkur.
Við þekkjum líklega öll fólk sem virðist alltaf lenda í rigningu og mótvindi, sama hvert það fer. Svo eru aðrir sem virðast alltaf finna sólina, sjá tækifæri í erfiðleikum og koma auga á það jákvæða í fólki og aðstæðum. Munurinn liggur ekki endilega í því sem gerist í lífi þeirra, heldur hvernig þeir túlka það.
Í þessum fróðlega og skemmtilega fyrirlestri er fjallað um áhrif hugarfars á líðan, hegðun og árangur. Með áhugaverðum rannsóknarniðurstöðum, óvæntum dæmum og hagnýtum ráðum fá þátttakendur innsýn í hvernig hugsanir okkar móta veruleikann sem við upplifum og hvernig hægt er að nýta þessa þekkingu til að efla sjálfstraust, takast betur á við áskoranir og skapa jákvæðari upplifun í lífi og starfi.
Fyrirlesari: Eyþór Eðvarðsson, MA í vinnusálfræði, þjálfari og ráðgjafi hjá Þekkingarmiðlun
