Í dag dynja á okkur upplýsingar og ráðleggingar um næringu úr öllum áttum, frá fjölmiðlum, samfélagsmiðlum og ótal vefsíðum. Upplýsingarnar eru oft misvísandi og stundum litaðar af viðskiptahagsmunum. En hverju eigum við að trúa og hvernig getum við greint á milli vísindalega traustra ráðlegginga og fullyrðinga sem eiga sér litla stoð í rannsóknum?
Þarfir okkar fyrir næringu eru mismunandi eftir aldri, heilsufari og aðstæðum. Það sem hentar einum þarf því ekki endilega að henta öðrum. Í fyrirlestrinum verður fjallað um hvernig næringarþarfir breytast eftir æviskeiðum og hvaða áhrif tilteknir sjúkdómar geta haft á ráðleggingar um mataræði.
Sérstök áhersla verður lögð á opinberar, gagnreyndar ráðleggingar um hollt mataræði og hvernig góðar matarvenjur geta stuðlað að bættri heilsu og dregið úr líkum á ýmsum sjúkdómum, svo sem krabbameini, offitu, sykursýki af tegund 2 og beinþynningu.
Þátttakendur fá jafnframt hagnýtar leiðbeiningar um hvernig lesa má úr merkingum matvæla, sérstaklega næringargildismerkingum, og nýta þær upplýsingar til að taka upplýstar ákvarðanir í daglegu lífi.
Fyrirlesari: Jóhanna Eyrún Torfadóttir er doktor í lýðheilsuvísindum og löggiltur næringarfræðingur. Hún hefur starfað á sviði næringarfræði frá árinu 2001 og býr yfir víðtækri reynslu af rannsóknum, ráðgjöf og fræðslu. Meðal verkefna hennar hafa verið ráðgjöf til skólamötuneyta, matvælalöggjöf og neytendavernd, auk rannsókna og kennslu við Háskóla Íslands.
Jóhanna hefur haldið fjölda fyrirlestra um næringu og heilsu, meðal annars í tengslum við störf sín hjá Reykjavíkurborg og Umhverfisstofnun. Doktorsrannsókn hennar fjallaði um tengsl næringar við áhættu á krabbameini í blöðruhálskirtli. Hún hefur einnig rannsakað tengsl D-vítamínbúskapar á efri árum við áhættu á krabbameini í brjóstum og blöðruhálskirtli.
