Markmiðasetning er öflug aðferð til að skapa skýrari sýn á framtíðina, beina kröftum okkar í rétta átt og auka líkurnar á að við náum því sem við stefnum að. Rannsóknir sýna að skýr og vel skilgreind markmið geta aukið hvatningu, einbeitingu og árangur, bæði í einkalífi og starfi.
En það er ekki nóg að vita hvert við viljum stefna. Við þurfum líka að átta okkur á því hvað skiptir okkur raunverulega máli, setja okkur raunhæf en jafnframt krefjandi markmið og móta áætlun um hvernig við ætlum að ná þeim. Ekki síður mikilvægt er að vera undirbúin fyrir hindranir, sýna þrautseigju og halda áfram þótt á móti blási.
Í fyrirlestrinum er fjallað um áhrifaríkar aðferðir við markmiðasetningu og hvernig hægt er að breyta draumum og góðum fyrirætlunum í skýr og framkvæmanleg markmið. Þátttakendur fá innsýn í hvað einkennir árangursríka markmiðasetningu, hvernig hægt er að viðhalda hvatningu og hvaða leiðir hjálpa okkur að halda stefnunni þegar áskoranir verða á vegi okkar. Því markmið án áætlunar er oft lítið annað en góð ósk.
Fyrirlesari: Ingrid Kuhlman, MSc í hagnýtri jákvæðri sálfræði, þjálfari og ráðgjafi hjá Þekkingarmiðlun
