Hvað aðgreinir framúrskarandi fyrirtæki frá þeim sem ná aðeins góðum árangri? Hvers vegna tekst sumum fyrirtækjum að skara fram úr áratugum saman á meðan önnur standa í stað eða dragast aftur úr?
Í þessum fyrirlestri verður fjallað um tvær af áhrifamestu bókum stjórnunarfræðanna, Built to Last eftir Jim Collins og Jerry I. Porras og Good to Great eftir Jim Collins. Báðar byggja á viðamiklum rannsóknum á því hvað einkennir fyrirtæki sem ná framúrskarandi árangri og hvað greinir þau frá öðrum fyrirtækjum.
Rannsóknirnar voru einstaklega metnaðarfullar og spönnuðu samtals ellefu ár. Í þeirri fyrri var sjónum beint að fyrirtækjum sem höfðu náð að viðhalda framúrskarandi árangri í áratugi, en í þeirri síðari var rannsakað hvernig fyrirtækjum tekst að taka stökkið frá því að vera góð yfir í að verða framúrskarandi. Safnað var gríðarlegu magni gagna, meðal annars úr ársreikningum, skýrslum, viðtölum, bókum og fjölmiðlaumfjöllun, til að greina hvað raunverulega skiptir máli fyrir árangur fyrirtækja.
Bækurnar hafa notið mikilla vinsælda um allan heim og haft veruleg áhrif á hugmyndir um stjórnun, forystu og uppbyggingu fyrirtækja.
Fyrirlesari: Eyþór Eðvarðsson, MA í vinnusálfræði, þjálfari og ráðgjafi hjá Þekkingarmiðlun
