Nikótínpúðar eru til sölu nánast á hverju götuhorni og víða í netverslunum. Um 6% barna í 10. bekk notar daglega rafsígarettur og nikótínpúðar eru að verða sífellt vinsælli hjá börnum og unglingum. Engin lög eru um nikótínpúða og því getur hver sem er ákveðið að selja efni sem er jafn ávanabindandi og heróín.
Oft er lítið gert úr þeirri hættu sem fylgir nikótínneyslu, þrátt fyrir að læknisfræðilegar rannsóknir sýni að nikótín geti haft margvísleg skaðleg áhrif á heilsu og þroska barna og unglinga. Sérstaklega er varhugavert að ánetjast nikótíni á unga aldri, þegar heilinn er enn að þroskast.
Í fyrirlestrinum verður farið yfir stöðu þekkingar og útskýrt hvernig nikótínpúðar sem innihalda allt að þrefalt meira nikótín en sígarettur ógna heilsu barna og unglinga. Mikið er í húfi og á meðan ungdómurinn hefur óheftan aðgang að nikótíni er ein besta forvörnin vel upplýstir foreldrar. Því nikótínfíkn byrjar oftast á unglingsaldri og leiðir oft og tíðum til annarra fíkna..
Fyrirlesturinn hentar sérstaklega vel fyrir foreldrafélög og aðra sem vilja stuðla að öflugum forvörnum meðal barna og unglinga.
Fyrirlesari: Lára G. Sigurðardóttir, læknir og doktor í lýðheilsuvísindum
