Saga Veigu er saga konu sem var föst í líkama karls í 38 ár. Hún vissi hver hún var innst inni en gat ekki lifað í samræmi við eigin kynvitund. Í þessum einlæga og áhrifamikla fyrirlestri segir Veiga frá því hvernig það var að alast upp, ganga í gegnum unglingsárin og verða fullorðin á sama tíma og hún þurfti stöðugt að fela sitt sanna sjálf.
Árin í felum tóku sinn toll. Innri baráttan varð sífellt þyngri og að lokum náðu þunglyndi og sárar hugsanir um að vilja ekki lifa lengur yfirhöndinni. En Veiga fann hugrekkið til að horfast í augu við sjálfa sig, viðurkenna eigin tilfinningar og kynvitund og takast á við bæði eigin fordóma og annarra. Hún fór í kynleiðréttingu með öllum þeim aðgerðum og meðferðum sem henni fylgja og steig sín fyrstu skref í átt að því að lifa lífinu sem hún hafði svo lengi þráð.
Líf hennar hefur ekki alltaf verið dans á rósum, en Veiga hefur lært að fylgja hjartanu og gefast ekki upp þótt á móti blási. Í dag er hún hamingjusöm kona sem hefur öðlast dýrmæta reynslu og innsýn í mikilvægi þess að fá að vera maður sjálfur.
Veiga segir sögu sína á einstakan, einlægan og oft bráðskemmtilegan hátt. Húmorinn er aldrei langt undan, enda hafa margar uppákomurnar verið svo kostulegar að ekki er annað hægt en að brosa. Hvað segir maður til dæmis í sturtunni í sundlauginni þegar barnið manns kallar„Pabbi!“
Saga Veigu er áhrifamikil frásögn um hugrekki, sjálfsmynd, fordóma og þrautseigju. Umfram allt er hún saga um frelsið til að vera maður sjálfur, saga sem á erindi til okkar allra.
Ummæli:
Fyrirlesturinn var mjög áhugaverður og Veiga var mjög einlæg og hispurslaus í sinni frásögn. Eftir fyrirlesturinn gaf hún færi á spurningum og út frá þeim spunnust áhugaverðar umræður. Í alla staði góður fyrirlestur.
Sigríður Héðinsdóttir, mannauðsstjóri Daga
